„Við teljum að um 35 til 40 þúsund manns hafi komið þarna við,“ segir Árni Georgsson, einn aðstandenda Matarhátíðar alþýðunnar. Hátíðin fór fram í miðborginni um helgina, aðallega á Skólavörðustíg. Á hátíðinni var boðið upp á skemmtiatriði og lifandi tónlist, auk beikonrétta af ýmsu tagi.

Íslenskur landbúnaður var kynntur fyrir Beikondrottningunni Allison Schafer en hún er frá Iowa og var í fyrra kjörin Beikondrottning ársins á Blue Ribbon-beikonhátíðinni þar á bæ. Árni segir í samtali við DV að hátíðin hafi gengið sérstaklega vel. Flæði gesta hafi verið gott og allir hafi fengið eitthvað í gogginn. Fjöldi skemmtiatriða var í boði á hátíðinni en markmið hennar er að vekja athygli á landbúnaðarvörum.

Matarhátíð alþýðunnar byggir á grunni Beikonhátíðarinnar, sem haldin hefur verið undanfarin fimm ár. Nú voru fleiri landbúnaðargreinar með. „Þetta var best heppnaða hátíðin hingað til. Þarna voru kórar og harmoníkuleikur og rífandi stemning.“ Árni á von á því að hátíðin verði haldin með svipuðu sniði næsta ár því veitingahús, bændur og aðrir þátttakendur hafi verið mjög ánægðir með fyrirkomulagið. Allur ágóði af hátíðinni rennur til góðgerðarmála en í fyrra gáfu aðstandendur Styrktarfélagi lamaðra og fatlaðra augnlesara. Ekki hefur verið tekin ákvörðun um hvaða félag verður styrkt í haust, þegar búið verður að gera hátíðina upp.