Það fögnuðu margir endurkomu bresku tónlistarkonunnar Adele fram á sjónarsviðið á síðasta ári. Lítið hafði heyrst af Adele í þónokkurn tíma, eða síðan hún eignaðist son sinn, Angelo, fyrir um þremur árum.

Ný plata með Adele leit dagsins ljós í nóvember og er söngkonan nú á tónleikaferðalagi. Aðdáendur Adele munu þó væntanlega þurfa að bíða lengi eftir nýrri plötu ef marka má heimildarmann breska slúðurblaðsins The Sun. Heldur blaðið því fram að þegar tónleikaferðalagi Adele lýkur síðar á árinu muni tónlistarkonan taka sér fimm ára hlé frá tónlist.

„Hún hefur sagt nánum vinum sínum að hún ætli sér að stíga út úr sviðsljósinu næstu fimm árin áður en hún vindur sér í að gera nýja plötu. Hún er enn móðir ungs barns og vill ekki missa af neinu í uppvexti sonar síns,“ segir heimildarmaður blaðsins.

Þessi tíðindi koma ekki endilega á óvart enda hefur Adele aldrei verið mikið fyrir sviðsljósið og viljað halda sínu einkalífi fyrir sig. Sem fyrr segir kom nýjasta plata hennar út í nóvember í fyrra en þar áður gaf hún út plötu í janúar 2011. Liðu því tæp fimm ár á milli platnanna. Fyrsta plata Adele leit hins vegar dagsins ljós árið 2008.