Leikarinn Timothy Bushfield hefur verið sakaður um barnaníð en hann er hvað þekktastur fyrir leik sinn í pólitísku dramaþáttunum The West Wing. Handtökuskipun var gefin út þann 9. janúar og gaf leikarinn sig fram við lögreglu viku síðar.

Busfield er meðal annars sakaður um að hafa snert börn á óviðeigandi hátt á tökustað sjónvarpsþáttanna The Cleaning Lady, en hann bæði leikur í og leikstýrir þáttaröðinni. Umrædd börn eru tvíburabræður sem léku í þáttunum.

Fyrir helgi greindu fjölmiðlar frá því að þriðja meinta þolandanum, maður að nafni Colin Swift, segir að leikarinn hafi káfað á 16 ára dóttur sinni í áheyrnarprufu skömmu eftir aldamótin. Leikarinn hafi svo grátbeðið foreldra stúlkunnar um að tilkynna brotið ekki til lögreglu og hét því að leita sér aðstoðar.

TMZ hefur nú birt sprengju um málið, en miðillinn hefur undir höndum upptöku af fyrstu skýrslugjöf tvíburabræðranna hjá lögreglu í nóvember árið 2024. Þar voru drengirnir spurðir hvort leikarinn hefði snert þá með óviðeigandi hætti og neituðu þeir því báðir.

Ákæruvaldið heldur því fram að drengirnir hafi ekki opnað sig um brotin fyrr en eftir þessa fyrstu skýrslugjöf, í samtali við sálfræðing.

Fyrrum starfsmaður á tökustað The Cleaning Lady hefur eins gefið skýrslu í málinu en hann segist hafa heyrt móður drengjanna lýsa því yfir að ef synir hennar yrðu reknir úr þáttunum þá myndi hún ná sér niður á Busfield. Leikarinn heldur því sama fram – ásakanirnar hafi ekki komið fram fyrr en eftir að hann ákvað að skipta tvíburunum út fyrir yngri leikara.

Busfield hefur einnig leitt fram annað vitni um ásakanir stúlkunnar frá árinu 2001, en vitnið segist hafa rætt við föður stúlkunnar sem vildi ólmur koma á framfæri handriti fyrir sjónvarpsþætti. Taldi faðirinn öruggt að Busfield myndi sýna réttu aðilunum handritið. „Hann þarf að gera það ef hann heldur að hann fái að ríða dóttur minni“

Vitnið segist hafa spurt föðurinn hvers vegna Busfield ætti að vilja sænga hjá dótturinni og þá mun faðirinn hafa svarað: „Því hún er algjör skvísa“.