Tónlistarparið Júlí Heiðar og Dísa sendu í dag frá sér nýtt frumsamið lag sem ber heitið „Fæ ekki nóg“ og er unnið í samvinnu við Pálma Ragnar Ásgeirsson.
Lagið dansvæna fjallar um annríki þeirra í bransanum enda fara flestar helgar í að skemmta víða um landið en ekki síður hversdaglega hluti eins og matarást þeirra á IKEA. Von er á plötu frá parinu síðar á árinu sem segja má að sé tilkomin vegna þess að rík þörf var á því að þau myndu koma sér upp fleiri sameiginlegum lögum.
„Þegar við troðum upp þá höfum við verið að taka mörg lög sem að ég hef gefið út með öðru tónlistarfólki. Dísa hefur því þurft að bregða sér í allskonar hlutverk, til að mynda að rappa eins og Kristmundur Axel og syngja eins og GDRN. Við höfum haft mikið að gera í allt sumar og fundið sterkt fyrir því að okkur vantaði sárlega fleiri lög saman þó að Dísmundur Axel sé sannarlega næstbesta útgáfan á eftir frumgerðinni“ segir Júlí Heiðar kímin.
Þegar stund var á milli stríða náði parið því að skella sér í stúdíóið til Pálma og afraksturinn var „Fæ ekki nóg“ auk tveggja annarra laga sem verða gefin út síðar á árinu.
