Hægt er að koma í veg fyrir slæma heilsu á efri árum með því að takmarka óheilbrigt líferni snemma á lífsleiðinni. Í umfjöllun Independent kemur fram að þeir sem drekka mikið áfengi, reykja og stunda litla hreyfingu fara að finna fyrir afleiðingunum á heilsuna um 36 ára aldurinn. Á þessum aldri fer ólifnaðurinn að taka sinn toll og getur þýtt að fólk býr við slæma heilsu árum saman.

Um er að ræða niðurstöðu finnskrar rannsóknar þar sem fylgst var með 326 einstaklingum frá 27 ára aldri og var heilsa þeirra skoðuð við 36 ára aldurinn, 42 ára, 50 ára og síðan við 61 árs aldurinn en þá voru enn 206 þátttakendur eftir.

Niðurstöðurnar voru í stuttu máli þær að þeir sem drukku, reyktu og hreyfðu sig lítið glímdu við ýmsikonar heilsukvilla. Mikilvægt væri því að takmarka þessa þætti til þess að geta átt von á því að vera við góða heilsu fram eftir ævinni.