Það var fullt úr úr dyrum í versluninni Epal fyrr í mánuðinum þegar félagarnir Guðjón og Kári, sem mynda tvíeykið Skripo, opnuðu líflega og bjarta málverkasýningu.

Guðjón Viðarsson og Kári Þór Arnarsson, báðir fæddir 1997, hafa verið vinir frá því að þeir voru í leikskóla í Garðabæ. Vinasamband þeirra hefur alla tíð einkennst af sköpun, allt frá fyrstu sameiginlegu teikningunum og að þeim málverkum sem þeir mála saman í dag.

Frá því sumarið 2023 hafa Guðjón og Kári málað myndir saman undir nafninu Skripo. Þeir vinna jafnan á tvo striga í einu, skiptast á að teikna og mála fígúrur, oft án þess að vita hvert verkið leiðir. Í sumum tilfellum teiknar annar aðeins augu eða nef áður en þeir skipta um striga og halda áfram á grunni hins. Þannig verður hver mynd samspil leikgleði, sköpunar og húmors án fyrirfram ákveðinnar niðurstöðu.

Opnun fyrstu sýningar Skripo fór fram föstudaginn 4. apríl í Epal á Laugarvegi 7. Líf og fjör var á opnuninni þar sem, hátt í 200 manns mættu og gæddu sér á léttum veitingum á meðan þeir skoðuðu fjölbreytt verk Guðjón sog Kára. Á meðal gesta var smíðakennari þeirra úr grunnskóla, Sædís Arndal sem mætti óvænt með listaverk sem þeir höfðu gert í smíðatímum hjá henni og má segja að marki upphaf Skripo. Á opnunina mætti einnig rithöfundurinn og myndlistarmaðurinn Óskar Guðmundsson sem hjálpaði þeim félögum að taka sín fyrstu skref.

Fjöldi fólks hefur mætt á sýninguna frá því hún opnaði en ásamt ásamt málverkum sem eru til sölu í Epal eru tölusett eftirprent af frumverkum og plaköt í boði. Í gegn um Instagram síðu þeirra skripo_art og heimasíðuna skripo.com hafa þeir félagar einnig tekið við sérpöntunum þar sem fólki gefst tækifæri til að panta verk í ákveðnu þema, litum, stærð o.s.frv. Þá fer það í aukanna að fólk hefur samband við þá félaga og pantar hitting með þeim í sýningarsalnum.

Sýningin stendur til 30. apríl og er opinn öllum á opnunartíma verslunarinnar Epal – Laugavegi 7.