Ólafur F. Magnússon, læknir og fv. borgarstjóri, hefur sent frá sér lagið Öræfaandi. Þetta er 36. lagið sem Ólafur gefur út en hann hóf að senda frá sér lagasmíðar árið 2013.

Eins og oft áður útsetur Vilhjálmur Guðjónsson lagið og sér um hljóðfæraleik, en Friðrik Grétarsson annast kvikmyndatöku myndbandsins sem fylgir hér með.

Lagið heitir Öræfaandi og er við ljóð Hákonar Aðalsteinssonar, sem hann orti á Eyjabökkum, við gjörning þar, 4. september 1999. „Ég kynntist Hákoni við Snæfellsskála 11. ágúst 1999, daginn áður en ég kom í fyrsta sinn á Eyjabakka, 12. ágúst 1999. Það átti síðar eftir að leiða til stofnunar Umhverfisvina, sem söfnuðu yfir 45.000 undirskriftum gegn 45 fkm uppistöðulóni á náttúruperlunni, gróður- og Ramsarvotlendissvæðinu Eyjabökkum, við austurhlíðar Snæfells í 600 m hæð,“ segir Ólafur.

„Við Hákon vorum saman í sigursveit grasrótarhreyfingarinnar Umhverfisvina og frægt varð þegar Hákon fór til Noregs á vegum Umhverfisvina og flutti konungi þar drápu með bón um að Eyjabökkum yrði þyrmt. Norsk Hydro átti að vera framkvæmdaraðili Fljótsdalsvirkjunar, en það var einmitt vegna þess þjóðarvilja, sem kom fram í undirskriftasöfnun Umhverfisvina, sem Norðmenn hættu við Fljótsdalsvirkjun. Það gerðist 30. mars árið 2000.“