Fyrrum aðstoðarmaður Díönu prinsessu telur að hjónaband hennar og Karls Bretaprins, sem nú er konungur, hafi ekki verið dauðadæmt þegar hún fór í frægt viðtal við Panorama hjá BBC árið 1995. Eftir viðtalið var þó öll von úti.

Aðstoðarmaðurinn, Patrick Jephson, segir í samtali við People að áður en viðtalið fór í loftið hafi enn verið mögulegt að hjónin næðu saman aftur, en þau höfðu verið skilin að borði og sæng frá árinu 1992.

„Eftir Panorama var of seint að snúa við fyrir Díönu og konungsfjölskylduna. En fyrir útsendinguna hefði ekki verið óvarlega áætlað að sættir væru mögulegar.“

Annað eins hafi nú gerst. Þau höfðu verið skilin að borði og sæng lengi en ekki gengið frá lögskilnaði. Mörg dæmi séu þess að fólk í þeirri stöðu hætti á endanum við að skilja.

Díana var svo að mati Jephson plötuð í viðtalið, en fram hefur komið að blaðamaðurinn á bak við það, Martin Bashir, sýndi prinsessunni fölsuð gögn til að sannfæra hana um að koma í viðtal. Meðal annars sýndi hann henni gögn sem bentu til þess að hún gæti engum treyst í starfsliði hallarinnar og að Karl hefði verið henni ótrúr, getið barn með viðhaldinu og sent ástkonuna í þungunarrof.

„Það sem Díana gerði með því að trúa Bashir – og ég efast um að hann átti sig á því hverju hann áorkaði – var að leika beint inn í hendur óvina sinna í herbúðum eiginmanns hennar og Camillu með því að sanna fyrir heiminum að hún væri ekki hentug eiginkona og því þyrfti að útiloka hana frá hirðinni. Ég veit að hún hafði margt til brunns að bera og hefði orðið mjög góð drottning.“

Jephson er líka sannfærður um að ef Díana hefði fengið að vita um blekkingar Bashir þá hefði hún aftur farið að treysta fólkinu í höllinni. Hún hefði þá þegið konunglega öryggisgæslu og hefði þá ekki látist í bílslysi á flótta undan blaðaljósmyndurum.

„Hún hefði haft öll þessi ár til að njóta sem móðir og synir hennar hefðu notið góðs af því. Og þjóðin hefði notið þess líka. Hún var hörkudugleg og samviskusöm prinsessa sem stóð sig vel í öllu sem hún gerði. Ég held að möguleikarnir á sættum [hennar og Karls] hafi verið hæpnir en þó ekki úr myndinni.“