Héraðssaksóknari hefur ákært Guðmund Elís Sigurvinsson fyrir að hafa vorið 2023 farið með 15 ára stúlku um borð í skipið Grímsnes GK-555 í Vestmannaeyjum.
Er Guðmundur Elís ákærður fyrir sifskapar- og barnaverndarlagabrot.
Lýst hafði verið eftir stúlkunni og hafði lögregla leitað að henni í Vestmannaeyjum. Síðan kom í ljós að hún var um borð í skipinu og var því þá snúið við. Var hún um borð í skipinu í 12 klukkustundir. Í ákæru yfir honum segir að hann hafi stuðlað að því að stúlkan kæmi sér undan umsjá foreldra sinna. Hann hafi stofnað heilsu og lífi stúlkunnar í alvarlega hættu án vitneskju og heimildar foreldra hennar.
Guðmundur Elís hefur áður verið dæmdur fyrir hrottalegt ofbeldi í nánu sambandi. Í september 2020 var viðtal í Kastljósi við Kamillu Ívarsdóttur, fyrrum kærustu Guðmundar Elís, þar sem hún sagði frá grófu ofbeldi sem hún varð fyrir af hálfu hans. Með henni í viðtalinu var móðir hennar Helga Sæunn Árnadóttir, sem sagði sögu sína í forsíðuviðtali Vikunnar í byrjun árs 2021.
Í dómi sem Guðmundur Elís hlaut í mars 2020 eru fjögur ofbeldisbrot hans tiltekin gegn Kamillu sem og annarri fyrrverandi kærustu sem jafnframt er barnsmóðir Guðmundar, og var hann sakfelldur fyrir þau öll.
Málið gegn Guðmundi Elís verður þingfest við Héraðsdóm Reykjavíkur þann 17. mars næstkomandi.
