Konan óskaði eftir ráðum í Facebook-hópnum Mæðra Tips:
„7 ára sonur minn elskar júróvísion og er ægilega spenntur að horfa á keppnina.
Ein okkar besta og nánasta vinkona er búin að tilkynna mér að hún ætli að loka á samskipti við 7 ára son minn ef ég leyfi honum að horfa á júróvísion vegna þátttöku Ísraels í keppninni. Hann sé að fremja glæp og hún ætli ekki að eiga samskipti við hann aftur.
Er mér ein að finnast þetta galin hegðun og framkoma við 7 ára barn? Vantar smá backup með þetta.
Ég hef haldið honum frá umræðum um stríð og pólitíska hlið á júró, sem er kannski rangt af mér, en að hóta því að hætta samskiptum við 7 ára barn því það ætlar að horfa á Væb finnst mér svo brútal.“
Svörin létu ekki á sér standa og voru langflestar, ef ekki allar, athugasemdirnar á þá leið að vinkonan væri að vera ósanngjörn. Sumar mæður sögðu konunni að slíta sjálf á samskipti við umrædda vinkonu.
„What!! Ég myndi aldrei tala við þessa vinkonu aftur ef hún myndi hóta 7 ára barninu mínu,“ sagði ein.
„Galið! Ef besta vinkona mín myndi gera þetta við mitt barn, þá myndi ég loka á öll samskipti við hana, bara bless. Hún á bara að hugsa um sig, ekki koma svona yfir á barnið,“ sagði önnur.
„Þetta er ekki vinkona ykkar,“ sagði ein einfaldlega.
Nokkrar mæður sögðust sjálfar vera á móti þátttöku Ísraels og velja að sniðganga keppnina, þeim myndi þó aldrei detta í hug að setja þessa skilmála á vináttu við sjö ára barn.
„Skil vel ef fólk vill sniðganga og virði það. En fáránlegt að hóta svona við 7 ára barn, alveg út í hött. Börnin elska þetta og vita lítið um Ísrael og stríðið,“ sagði ein.
„Ég hef sjálf sniðgengið allt tengt þessari keppni einmitt út af þátttöku þessara tilteknu þjóðar, enn mundi aldrei ráðskast með hvað aðrir gera og hvað þá börn. Þetta finnst mér full langt gengið hjá þessar blessuðu konu,“ sagði önnur.
