Nýársdagur 2023 rennur bandaríska leikaranum Jeremy Renner aldrei úr minni en þann dag lenti hann í skelfilegu slysi þegar hann varð fyrir snjómoksturstæki skammt frá heimili sínu í Tahoe-ríki í Nevada í Bandaríkjunum.

Jeremy Renner er mörgum að góðu kunnur úr bandarískum sjónvarpsþáttum og kvikmyndum, en hann hefur í tvígang verið tilnefndur til Óskarsverðlauna. Um það leyti sem slysið varð lék hann einnig í þáttunum Mayor of Kingstown sem fengu góða dóma.

Leikarinn hefur nú skrifað um slysið í nýrri bók sem ber heitið My Next Breath. Í bókinni lýsir hann slysinu og eftirmálum þess í smáatriðum en leikarinn var um tíma í mikilli lífshættu og þurfti að dvelja á sjúkrahúsi í tæpar þrjár vikur.

Sjá einnig: Jeremy Renner stígur fram í fyrsta viðtalinu síðan hann lenti í slysinu – „Ég var með meðvitund allan tímann“ 

„Ég veit að ég dó eiginlega. Þegar bráðatæknar mættu á staðinn sáu þeir að hjartslátturinn var kominn niður í 18 slög á mínútu. Það þýðir að maður er nánast dáinn,“ segir hann meðal annars.

Slysið varð þegar Renner var að reyna að bjarga 27 ára frænda sínum frá því að verða undir þessu sama snjómoksturstæki. Ekki vildi betur til en svo að Renner sjálfur kramdist undir en tækið sem um ræðir vegur sex og hálft tonn. Hann missti mikið blóð og braut alls 38 bein í líkama sínum.

„Ég heyrði beinin brotna; höfuðkúpuna, kjálkann, kinnbeinin, augnatóftirnar, sköflunginn, lærlegginn og mjaðmabeinið,“ segir hann en þar að auki braut hann fjórtán rifbein. „Á meðan ég lá þarna í snjónum hafði ég ekki hugmynd um að ég væri svona illa slasaður. Hann vissi þó að slysið væri slæmt þegar hann fann fyrir vinstra auganu „poppa út úr augnatóftinni“ eins og hann orðar það.

„Ég sá vinstra augað í mér með hægra auganu,“ rifjar hann upp í bókinni.

Renner hafði verið að njóta jólahátíðarinnar með fjölskyldu sinni þegar slysið varð, en vegna þess hversu hátt svæðið liggur getur þar oft snjóað mikið á veturna. Það tók líka viðbragðsaðila dágóða stund að komast á staðinn og á meðan Renner beið eftir aðstoð var hann nálægt því að ofkælast.

Svo fór þó ekki og var Renner fluttur með þyrlu á sjúkrahús þar sem hann gekkst undir aðgerðir. Fyrstu dagana eftir slysið segist Renner ekki hafa vitað hvort hann myndi ná bita. Segist hann hafa komið þeim skilaboðum áleiðis til fjölskyldu sinnar að hann vildi frekar deyja en vera spítalamatur það sem eftir er.

Renner náði í raun undraverðum bata með aðstoð góðra lækna og eftir slysið tók löng og ströng endurhæfing við. Hann hefur nú snúið aftur til starfa sem leikari, þar á meðal í þættina Mayor of Kingstown. Þá hefur hann lokið við tökur á kvikmyndinni Wake Up Dead Man sem er þriðja myndin í Knvies Out-seríunni svokölluðu, en í myndinni leikur hann á móti Daniel Craig.