Birgitta er gestur vikunnar í Fókus, spjallþætti DV. Margir kannast við hana úr Söngvakeppni sjónvarpsins en hún tók þátt á fyrra undanúrslitakvöldinu með lagið Ég flýg í storminn. Hún komst ekki áfram en fangaði hjörtu Eurovision aðdáenda um Evrópu alla.
Þú getur horft á þáttinn með Birgittu í heild sinni hér eða hlustað á Spotify. Hér að neðan má horfa á brot úr þættinum þar sem Birgitta ræðir um veikindin.
Sjá einnig: Missti ömmu sína sama kvöld og hún steig á svið – „Hún fékk að sjá mig og kvaddi svo þennan heim“
Birgitta fæddist á Tálknafirði. Fjölskyldan flutti til Spánar þegar hún var um tveggja ára gömul og bjuggu þar í ár. Þau settust að í Kópavogi þegar þau sneru aftur heim og hafa búið þar síðan.
Lífið gekk sinn vanagang þar til Birgitta var í áttunda bekk og veiktist alvarlega.
„Ég fékk veirusýkingu í heilann sem læknarnir vissu ekkert hvað var. Bara einn daginn í skólanum sit ég við borðið og byrja að anda fáránlega. Það líður yfir mig og er kallað á sjúkrabíl, svo verð ég alltaf smá betri og betri og er send heim af spítalanum, en svo gerist þetta aftur og aftur, þangað til ég er lömuð. Get ekki talað, labbað eða hreyft mig neitt og er í rosalegum skjálftaköstum,“ segir Birgitta.
„Þá er ég lögð inn á sjúkrahús og er í endalausum rannsóknum og prófum og þeir vita ekkert hvað er að, fyrr en einhver mjög gamall heilaskurðlæknir, held ég, kemur: „Já, ég held… Ég er búinn að vinna hérna í 50 ár og hef kannski séð 10 svona tilfelli, gæti verið þetta.“ Og var þá að meina veirusýkingu í heila, sem líkami minn var að vinna úr og þess vegna var ég að fá þessi skjálftaköst og þessi viðbrögð sem líkami minn fékk við að koma þessu út úr heilanum.“
Þetta tímabil er í móðu hjá Birgittu. „Ég var í algjöru blakkáti á þessum tíma. Eins og mamma lýsir þessu var ég gjörsamlega out of it. Eina sem ég veit er að ég fór í menntaskóla árið 2019 og þá var ég orðin þokkalega góð,“ segir hún.
Um tíma þegar læknar vissu ekki hvað hrjáði Birgittu var mikil óvissa um framtíð hennar, hvort hún myndi einhvern tíma ganga eða tala aftur.
„Ég fékk alveg svakaleg þunglyndisköst og vildi mögulega heldur ekki halda áfram að lifa ef ég myndi lifa svona. Ég held líka að þetta hafi hvatt mig mikið áfram í tónlistinni og komast út úr skelinni og vilja ekki fara „rútínuleiðina“ eins og margir gera, lífið er allt of stutt til að einblína ekki á draumana,“ segir hún.
Birgitta ætlaði að fara í sálfræði eða tannlæknanám en ákvað að elta frekar drauminn og skráði sig í hljóðtækni.
„Ég fann hvað tónlistin hjálpaði mér mikið að komast í gegnum allt saman. Ég var svo rosalega lokuð eftir allt þetta og feimin, var ekkert að tjá mig við heiminn, náttúrulega búin að missa út úr unglingsárunum sem er mjög viðkvæmur tími, en ég fann mig aftur inn í lífið í gegnum tónlist.“
Fylgdu Birgittu á Instagram, TikTok og hlustaðu á tónlistina hennar á Spotify.
