Það var mikið um dýrðir og margt um manninn við lokaathöfn alþjóðlegu kvikmyndahátíðarinnar í Gautaborg á laugardag. Hápunktur athafnarinnar var þegar dómnefndin tilkynnti að íslenska kvikmyndin, Ljósbrot eftir Rúnar Rúnarsson, hefði hlotið hin virtu Dragon Award, sem eru aðalverðlaunin á hátíðinni. Verðlaunaféð er með þeim hæstu í kvikmyndageiranum, rétt rúmlega fimm milljónir króna.

Heather Millard framleiðandi myndarinnar veiti verðlaununum viðtöku og þakkaði í ræðu sinni öllum þeim sem komu að gerð myndarinnar og gerðu hana að veruleika.

Rúnar Rúnarsson leikstjóri var veðurtepptur á Íslandi og komast því ekki á lokahóf hátíðarinnar.

„Kvikmyndir eru teymisvinna og hef ég verið lánsamur í gegnum tíðina að vinna með frábæru fólki. Ég er stoltur af þeim og því sem við höfum áorkað saman. Íslensk kvikmyndagerð hefur verið á miklu skriði og hefur það aðeins geta gerst vegna þess að jarðvegurinn, sem varð til við samvinnu ráðamanna, einkaaðila og listafólks, er til staðar.  En nú eru blikur á lofti og ef kvikmyndasjóður verður fjársveltur næstu ár að þá mun  þetta mikla uppbyggingarstarf fara í súginn. Vona að ný ríkisstjórn vindi ofan af þessari þróun,“ segir Rúnar.

Í ígrundun dómnefmdar kom fram að að Ljósbrot hafi hrifið þau með meistaralega nákvæmri leikstjórn, næmni og fínlegum léttleika sem og óvænt upplífgandi lýsingu leikstjórans á sorginni. Örugglega komið til skila af ungum og fullkomlega samsettum leikarahóp.

Kvik­mynda­hátíðin í Gauta­borg er helsta kvik­mynda­hátíð Norður­land­anna. Árlega sækja á annað þúsund fagaðilar úr alþjóðleg­um heimi kvik­mynda hátíðina og gest­ir á sýn­ing­um eru á annað hundrað þúsund tals­ins.

Þetta eru fjórtándu alþjóðlegu kvikmyndaverðlaun Ljósbrots sem hefur verið að fara sigurför um heiminn eftir að hafa hlotið standandi lófaklapp sem opnunarmynd á Kvikmyndahátíðinni í Cannes.  Með aðalhlutverk fara, Elín Hall, Katla Njálsdóttir, Mikael Kaaber,  Baldur Einarsson, Gunnar Kristjánsson og Ágúst Wigum.