Raunveruleikastjarnan Kelly Osbourne segir galið að sumar stórstjörnur séu að notfæra sér hamfaraeldana sem nú loga í Los Angeles til að vekja á sér athygli. Hún biður þessa aðila um að sleppa því að bjóða fram aðstoð ef það eina sem vakir fyrir þeim er að auglýsa sig.

„Er það bara efahyggjumanneskjan ég eða er mjög dapurt að sjá alla þessa frægu einstaklinga sem eru að notfæra sér sársauka og þjáningu annarra til að taka myndir og segja: Sjáið, ég er að hjálpa. Ég er að gera hitt og ég er að þetta?“

Framangreint sagði Osbourne í myndbandi á TikTok sem hún hefur nú eytt, en er engu að síður í mikilli dreifingu á miðlinum.

„Ég trúi því ekki að þið séuð að hjálpa bara til að fá athygli út á það. Fólk ætti að hjálpa bara því það vill það.“

Osbourne tók fram að hún botni hreinlega ekkert í því hvernig sumar stórstjörnur séu að bregðast við eldunum. Það sé siðferðislega rangt að stökkva á tækifærið þegar svona hamfarir ganga yfir til að vekja á sér athygli. Enginn hafi beðið þessar stjörnur um hjálp. Þær ættu því heldur að halda sig bara heima.

Margir töldu að Osbourne hafi þarna vísað til hertogahjónanna, Harry Bretaprins og Meghan Markle. Margar myndir hafa verið teknar af þeim í Los Angeles þar sem Meghan meðal annars gaf fatnað til félagsheimilis fyrir ungar stúlkur sem og snyrtivörur. Hjónin fóru eins í fjöldahjálparstöð þar sem þau föðmuðu fólk sem hafði misst heimili sín.

Osbourne er ekki ein um að finnast svona hátterni ósmekklegt. Leikkonan Justine Bateman hefur líka gagnrýnt hertogahjónin með beinum hætti. Hún skrifaði á X:

„Meghan Markle og Harry eru engu betri en lögmenn sem elta sjúkrabíla til að afla sér viðskiptavina.“

Bateman gekk enn lengra og kallaði hertogahjónin hamfaratúrista.

Talsmaður Meghan hefur brugðist við orðum Batemen og segir hertogaynjuna sármóðgaða.

„Meghan er fædd og uppalin í Los Angeles svo þetta er og hefur alltaf verið heimili hennar. Hún er niðurbrotin út af öllum þeim sem hafa látist í eldunum og öllum heimilunum sem brunnu til grunna í eldunum.“

Fleiri stjörnur hafa boðið fram aðstoð. Til dæmis leikkonurnar Jennifer Garner og Jessica Alba. Enn fleiri stjörnur hafa veitt styrki til neyðarsjóðs og raunveruleikastjarnan Kim Kardashian hefur gefið fatnað úr aðhaldslínu sinni Skims og Jennifer Lopez hefur gefið notuð föt af sjálfri sér.