Reykjavík Jazz fer fram dagana 27. ágúst – 1. september. Hátíðin hefur verið haldin árlega allt frá árinu 1990 og er næst elsta tónlistarhátíð landsins af þeim tónlistarhátíðum sem enn eru starfræktar. 

Hátíðin er vettvangur alls þess helsta sem gerist á sviði innlendrar jazztónlistar og hefur oft verið kölluð uppskeruhátíð innlends jazztónlistarfólks.

„Meginmarkmið Reykjavík Jazz er að styðja við og kynna jazztónlist og bjóða tónlistarfólki og jazzunnendum upp á framúrskarandi vettvang og umgjörð þar sem þeir geta flutt og notið áheyrnar þess besta sem gerist í innlendri og erlendri jazztónlist,“ að sögn Péturs Oddbergs Heimissonar, framkvæmdastjóra og formanns stjórnar Reykjavík Jazz.  

Með honum í stjórn sitja Rebekka Blöndal, söngkona og meðstjórnandi og Sigmar Þór Matthíasson, bassaleikari og meðstjórnandi en stjórnin var kosin á aðalfundi Reykjavík Jazz í lok janúar. 

„Stjórnin hefur unnið hörðum höndum að undirbúningi hátíðarinnar síðastliðna mánuði.

Stjórn leggur áherslu á þá gríðarlegu grósku sem á sér stað í jazzsenunni hér á landi þar sem fjöldi íslensks jazztónlistarfólks í fremstu röð kemur vikulega fram á tónleikum víðs vegar um bæinn. Við hlökkum til að koma saman, gleðjast, fagna saman og njóta fjölbreyttrar jazztónlistar.“

Lögð er áhersla á að bjóða upp á tónleika með erlendu jazztónlistarfólki í fremstu röð og á hátíðinni í ár verður tónlistarfólk frá Bandaríkjunum, Þýskalandi, Danmörku, Austurríki, Grikklandi og Færeyjum.

Tónleikar á hátíðinni í ár fara fram í Hörpu, Fríkirkjunni í Reykjavík, Jómfrúnni, SKY bar, Jörgensen Kitchen & Bar, BIRD, Óháða söfnuðinum og Hvalaskoðunarfyrirtækið Elding mun bjóða upp á tónleika með Jazzcruise Brassband á einum af hvalaskoðunarbáti fyrirtækisins.

Í samstarfi við Menntaskóla í Tónlist (MÍT) verður boðið upp á námskeið með tveimur erlendum flytjendum, þeim Jens Larsen, gítarleikara og Chris Speed, saxófónleikara frá Bandaríkjunum sem er Íslendingum góður kunnugur. 

Að auki verða svokallaðir showcase tónleikar þar sem nýútskrifaðir nemendur við Jazzdeild MÍT koma fram á nýjum tónleikastað sem kallast BIRD.

Allar upplýsingar má finna á Reykjavík Jazz.