Bandaríska leikkonan Sharon Stone fékk heilablóð árið 2001, sem olli níu daga heilablæðingu. Í viðtali við Hollywood Reporter sem birt var í gær, þriðjudag, segist hún hafa tapað öllu sparifé sínu í kjölfarið þar sem fólk hafi notfært sér hana í bataferlinu og sjö ára fjarveru hennar frá Hollywood.
„Ég átti 18 milljón dala sparnað vegna allrar velgengni minnar, en þegar ég komst aftur inn á bankareikninginn minn var allt horfið. Ísskápurinn minn, síminn minn, allt var farið og á nafni annara. Ég átti engan pening.“
Leikkonan, sem varð heimsfræg á einni nóttu fyrir hlutverk hennar í Basic Instinct árið 1992 og varð í kjölfarið eitt kyntákn tíunda áratugarins, er orðin 66 ára. Hún lítur til baka til þessa erfiða veikindatímabils með blendnum tilfinningum. Hún segir heilablóðfallið hafa breytt því hvernig heili hennar starfar og hvernig hún hugsar.
„Búddistamunkur sagði mér að ég hefði endurfæðst í sama líkama,“ segir Stone. „Ég lenti í dauðareynslu og svo náðu þeir mér til baka. Það blæddi inn í heilann í níu daga, og hann er ekki staðsettur í höfðinu á mér þar sem hann var áður. Og á meðan þetta gerðist breyttist allt: lyktarskynið, sjónin, snertingin. Ég gat ekki lesið í nokkur ár. Margir héldu að ég myndi deyja.“
Stone segist hafa getað haldið áfram með líf eftir að hafa tapað öllum fjármunum sínum vegna þess að hún hafi ákveðið að vera til staðar og sleppa tökum á því liðna.
„Ég ákvað að dvelja ekki við það að vera veik eða við einhverja biturð eða reiði. Ef þú bítur í fræ biturleikans fer það aldrei frá þér. En ef þú heldur trúnni, jafnvel þótt þessi trú sé á stærð við sinnepsfræ, muntu lifa af. Núna lifi ég fyrir gleði, ég lifi fyrir tilgang.