Mosley fannst látinn fimm dögum eftir að hann skilaði sér ekki heim úr gönguferð á grísku eyjunni. Talið er að Mosley hafi örmagnast í hitanum á eyjunni samkvæmt bráðabirgðaniðurstöðum krufningar.
Daily Star rifjar upp viðtal sem Mosley veitti breska blaðinu Telegraph árið 2016, en þar varpaði hann ljósi á ákveðna staðreynd varðandi karlmenn í fjölskyldu hans. Benti hann á að enginn þeirra hefði náð meira en 72 ára aldri.
Mosley ræddi föður sinn sérstaklega en hann hafði þróað með sér sykursýki rúmlega fimmtugur og lést af völdum hjartaáfalls skömmu eftir að hafa gengist undir aðgerð þar sem fjarlægja átti blöðruhálskirtilinn.
Mosley segist ekki hafa viljað enda eins og faðir sinn sem náði aldrei að sjá barnabörnin sín vaxa úr grasi. Segir Mosley að dauði föður hans hafi gert það að verkum að hann ákvað að tileinka sér heilbrigðari lífsstíl.
„Ég hugsaði með mér að þetta væri ekki sú leið sem ég vil fara. Þegar pabbi hætti að vinna þá sat hann í sófanum allan daginn og horfði á íþróttir sem var mjög slæmt fyrir hann,“ sagði Mosley sem lærði læknisfræði en starfaði lengst af í fjölmiðlum auk þess að skrifa vinsælar bækur um heilsu og næringu.
