Björn Berg fjármálaráðgjafi hvetur Íslendinga til að hafa varann á þegar þeir ferðast erlendis en sumum hraðbönkum er ekki treystandi. Það getur verið erfitt að segja til um hvaða hraðbanka er öruggt að taka út seðla en Björn kom með einfalt ráð í hlaðvarpsþættinum Götustrákar á Brotkast. Nútíminn greindi frá.
„Ef þú ert einhvers staðar þar sem þú sérð matseðil með ljósmyndum af matnum, þá er einhver hraðbanki þar rétt hjá sem er að fara að svindla á þér,“ sagði Björn. Slíkir staðir eru mjög vinsælir í sólarlöndum, eins og Tenerife sem er mjög vinsæll áfangastaður hjá Íslendingum.
„Passaðu þig á þessu. Það eru þessir hraðbankar sem eru á mjög aðgengilegum túristastöðum. Það er verið að bjóða þér eitthvað hrikalegt gengi og þú vilt heldur ekki vera að fá slæmt gengi á kortið þitt ofan á krónuna í ofanálag.“
Sumir hraðbankar rukka ævintýralegt gjald en fjölmiðlamaðurinn Auðunn Blöndal kom illa út úr slíkum hraðbankaviðskiptum.
Björn segir að hann hafi heyrt Audda segja söguna í hlaðvarpinu Blökastið. „Hann ýtti bara á „yes“ og „yes“ og „yes.““
Auddi tók út hundrað þúsund krónur en þurfti að borga hátt í 20 þúsund krónur aukalega.
„Út af því að hann ýtti á „yes“ að þá samþykkti hann að borga 17 prósent. Svo var einhver með honum sem tók út 100 þúsund krónur og ýtti bara á „no“ og borgaði ekki neitt.“
Þáttinn í heild sinni má nálgast á Brotkast.is.
