„Það er mikill heiður að fá að leggja honum lið í baráttunni og við stöndum með honum alla leið,“ segja Sigga, Beta og Elín úr hljómsveitinni Systur, en þær lýsa eindregnum stuðningi við Bashar Murad sem keppir til úrslita í Söngvakeppninni á laugardaginn. Systur og Bashar komu saman í söngstund á dögunum, og lýstu yfir gagnkvæmri aðdáun og virðingu.
„Ég er mikill aðdáandi Systra frá því að þær tóku þátt í Eurovision 2022. Mig hefur lengi langað til að syngja með þeim þannig að þetta var ótrúlega skemmtilegt djamm hjá okkur. Það var líka gott að fá orkuna frá þeim svona á lokametrunum,“ sagði Bashar.
Undanfarna daga hefur Bashar nýtt tímann í að hitta fólk og kynna framlag sitt. Meðal annars heimsótti hann frístundaheimilin Frostheima og Þróttheima þar sem hann kenndi krökkum dabke dansinn. Dansinn er levantískur og er blanda af hring- og línudans. Þetta er dans gleði sem gjarnan er stiginn í brúðkaupum og öðrum gleðskap. Hann er víða stiginn í miðausturlöndum, þá einkum í Palestínu, en þaðan kemur Bashar einmitt.
Bashar mætir í Partýbúðina klukkan 17 í dag þar sem hann áritar plaköt. Hann hvetur fólk til að setja upp hvítan kúrekahatt og birta mynd af því á samfélagsmiðlum til stuðnings atriðinu.
Framlag Bashar Murad er afrakstur samstarfs hans við Hatara-menn, Einar og Matthías. Lagið fjallar um ferðafrelsi, raunveruleg og ímynduð landamæri. Margir muna eflaust eftir því þegar Hatari og Bashar tóku höndum saman í kjölfar Eurovision 2019, en þar flaggaði Hatari fána Palestínu í beinni útsendingu. Vakti uppátæki Hatara mikla athygli, enda keppninn haldin í Ísrael það árið. Margir höfðu skorað á Hatara og RÚV að sniðganga keppninna það árið í samstöðu með Palestínu og nýttu margir samfélagsmiðla til að mótmæla keppninni og senda Palestínu stuðning.
Bashar ákvað svo að taka þátt í Söngvakeppninni, en eftir að sú ákvörðun var tekin byrjaði stríðið sem nú stendur yfir og margir hafa kallað þjóðarmorð Ísrael gagnvart Palestínu. Framlag Bashar er því táknrænna en upphaflega stóð til. Sá möguleiki einn að Bashar verði fulltrúi Íslands varð til þess að við tókum stökk í veðbönkum og er sem stendur spáð þriðja sæti, Úkraínu spáð öðru sæti og Króatíu spáð sigri.
Á myndbandinu hér fyrir neðan má sjá afrakstur söngstundar Systra og Bashar. Úrslitin í Söngvakeppninni fara fram á morgun og spennan í hámarki.
VESTRID VILLT from Tattarrattat on Vimeo.
