Í nýrri færslu á Facebook-síðunni Karlmennskan sem Þorsteinn V. Einarsson kynjafræðingur heldur úti er fullyrt að verslunin Barnaloppan í Reykjavík sé skýrt tákn um allt sem sé að í verkaskiptingu milli karla og kvenna á Íslandi. Feðurnir séu fjarverandi á meðan mæðurnar vinni alla vinnuna.
Vitnað er í færslunni í hlaðvarpið Sópað undan teppinu sem Þorsteinn heldur úti í samvinnu við konu sína Huldu Tölgyes sálfræðing:
„Það er meira að segja mynd á veggnum í Barnaloppunni sem lýsir þessu. Kona sem sem heldur á barni og horfir í augun á því en pabbinn situr með lappir uppá borði að horfa á kaffibollann sinn.“
Greiða þarf fyrir aðgang að hlaðvarpinu.
Barnaloppan er verslun þar sem fólk getur bæði keypt og selt notaðar barnavörur til dæmis föt og leikvang. Hægt er að leigja bás í versluninni til að selja vörur sínar en á heimasíðu verslunarinnar segir að í boði sé að starfsfólk hennar sjái um sölubása fyrir fólk en viðskiptavinir geti einnig séð um rekstur bássins sjálfir.
Eftir tilvitnunina í hlaðvarpið skrifar Þorsteinn um Barnaloppuna í færslunni:
„Barnaloppan, með öllu sem henni tilheyrir, endurspeglar kynjakerfið á svo margan hátt. Konur versla og selja á samfélagslega ábyrgan og skynsaman hátt fyrir börnin sín og heiminn í heild. Dæmigert hvernig konur eru gerðar ábyrgar og taka til sín ábyrgð. Pabbarnir eru nánast algjörlega fjarverandi. Kannski skiljanlega þar sem umsjón með sölubás felur í sér verulega aðra og þriðju vaktar vinnu. Vinnu sem krefst yfirsýnar, fjölbeitingar og langtíma skuldbindingar – áður en vinnan skilar tekjum.“
Með færslunni fylgir ekki rökstuðningur fyrir því að rekstur sölubása í Barnaloppunni sé nær alfarið á hendi kvenna en vísað í áðurnefnt hlaðvarp Sópað undan teppinu sem eins og áður segir er læst fyrir aðra en áskrifendur.
