Þórhallur Heimisson prestur, sem býr og starfar í Svíþjóð, segir í nýrri færslu á Facebook-síðu sinni að það sé sorglegt að grein sem hann skrifaði um innflytjendur á Íslandi árið 2006 skuli enn eiga erindi, miðað við umræðu síðustu vikna. Því endurbirtir hann greinina í færslunni en þar minnir hann Íslendinga á að hafa helsta grundvöll kristninnar í huga gagnvart innflytjendum, Gullnu regluna.
Þórhallur segir Gullnu regluna eina helstu undirstöðu siðfræði Vesturlandabúa:
"Hana er að finna í ræðu Jesú Krists í Matteusarguðspjalli og hún hljóðar þannig með orðum hans: "Allt sem þér viljið að aðrir menn gjöri yður, það skuluð þér og þeim gjöra"."
Í ljósi þessarar reglu sé sorglegt hvernig heyrst hafi talað um innflytjendur hér á landi að undanförnu:
""Þessir" innflyjendur eru sagðir "pakk", það þarf að vernda börnin okkar fyrir "þeim", "þeir" eru allir nauðgarar og glæpamenn, best væri setja "þá" í gám og senda þá burt af landi ... og margt hefur verið sagt þaðan af verra. Saga 20. aldarinnar sýnir hvert slík orðræða leiðir."
Íslendingar ætlist hins vegar til að vel sé tekið á móti þeim þegar þeir flytji til annarra landa. Hann minnir á að um 50.000 Íslendingar búi erlendis.
Hann hvetur þá Íslendinga sem enn búa á Íslandi til að taka vel á móti innflytjendum. Þeir auðgi landið og menninguna. Taka ætti á móti þeim með sama hætti og Íslendingar sem flytja til annarra landa myndu vilja að tekið yrði á móti þeim og fylgja þannig Gullnu reglunni:
