Tónlistarmaðurinn Patrik Atlason, betur þekktur sem Prettyboitjokko, og kærasta hans, Friðþóra Sigurjónsdóttir, eru stödd á Ibiza ásamt vinum sínum.

Þau mættu á eyjuna í gær en flugferðin var ansi skrautleg og greindi súkkulaðidrengurinn frá því að farþegi í vélinni hafi krafist þess að útvarpsmaðurinn Gústi B, sem er í för með þeim, myndi gefa honum nammi úr bland í poka.

Patrik, sem er með yfir sjö þúsund fylgjendur á Instagram, var sjálfur ekkert að sækjast eftir því að fá nammi, enda ekki ánægður með nammiúrvalið þar sem ekkert í pokanum var frá Góu. Patrik er barnabarn Helga Vilhjálmssonar, betur þekktur sem Helgi í Góu, og hefur tónlistarmaðurinn verið óhræddur í gegnum tíðina við að flagga ættartengslunum.

Sjá einnig: Barnabarn Helga í Góu keyrir um á tæplega 14 milljóna króna sportbíl

Patrik birti myndband af hótelherbergi hans og Friðþóru á Instagram í gær, en í morgun greindi hann frá því að þau væru komin með annað og betra hótelherbergi.

Parið gistir á Ushuaia strandhótelinu á Ibiza og virðist nýja herbergið þeirra vera „Anything Can Happen“ svítan.

Patrik og Friðþóra hafa verið saman síðan í fyrrasumar. Tónlistarmaðurinn skaust fram á sjónarsviðið í vor og hafa lög hans fengið mörg hundruð þúsund spilanir á Spotify.

Sjá einnig: Prettyboitjokko hafði það fínt hjá afa sínum