Leikarinn og fyrrverandi ríkisstjórinn Arnold Schwarzenegger opnar sig í fyrsta sinn um framhjáhaldið sem eyðilagði hjónabandið hans og augnablikið þegar hann viðurkenndi loksins fyrir þáverandi eiginkonu sinni, Mariu Shriver, að hann hafi feðrað lausaleiksbarn með húshjálpinni.
Leikarinn rýfur þögnina um atvikið í nýrri heimildarþáttaröð – Arnold – sem kemur út á Netflix þann 7. júní næstkomandi.
Hann segir frá því þegar hann loksins viðurkenndi sannleikann en orðrómur um faðerni drengsins hafi verið á kreiki um skeið.
Það var árið 2011, en Arnold átti í leynilegu ástarsambandi við húshjálpina, Mildren Baena, árið 1996. Sonur þeirra, Joseph Baena, fæddist árið 1997.
Arnold giftist Mariu Shriver árið 1986. Þau eignuðust fjögur börn og glímdu við ýmsa hjónabandserfiðleika í gegnum árin en það sem gjöreyðilagði samband þeirra var þegar Maria komst að framhjáhaldi Arnolds og að Joseph væri sonur hans.
Á þeim tíma voru Arnold og Maria í hjónabandsráðgjöf.
„Einn daginn sagði ráðgjafinn: „Í dag vill Maria fá eitt á hreint. Hún vill vita hvort þú sért faðir Joseph.“ Mér fannst eins og hjartað mitt hafi hætt að slá og síðan sagði ég sannleikann: „Já, Maria. Joseph er sonur minn.“ Þetta augljóslega gerði út af við hana,“ segir fyrrverandi ríkisstjórinn.
Hann viðurkennir að framhjáhaldið hafi verið „stærstu mistökin“ hans.
„Allir þurftu að þjást vegna mín. Maria þurfti að þjást, börnin mín, Joseph, móðir hans, allir. Ég þarf að lifa með því sem eftir er ævi minnar,“ segir hann.
Arnold hefur stutt Joseph og móður hans fjárhagslega nánast frá upphafi. Árið 2010 keypti hann hús handa þeim og segist leikarinn vera mjög stoltur af syni sínum. Joseph hefur fetað í fótspor föður síns og er bæði leikari og vaxtarræktarmaður.
Arnold er heimildarmynd í þremur hlutum og kemur út á Netflix þann 7. júní næstkomandi.