Í þættinum Matur og heimili í kvöld heimsækir Sjöfn Þórðar tónlistarkonuna og nýbökuðu móðurina Gretu Salóme en hún og maðurinn hennar Elvar fjárfestu í fokheldu húsi á einstökum stað í Mosfellsbænum fyrir liðlega tveimur árum sem þau hafa gert að sínu með glæsilegri útkomu. Fallegir litatónar ylja á heimilinu og heimilisstíllinn er stílhreinn og í anda litlu fjölskyldunnar.

„Við kolféllum fyrir útsýninu hér,“ segir Greta Salóme og bætir við að eftir að hafa séð það hafi ekki verið aftur snúið og húsið keypt. Hönnunina á húsinu að innanverður sáu Greta Salóme og Elvar meira og minna um sjálf.

„Okkur langaði að gera heimilið að okkar, það erum við sem búum hér og við erum ótrúlega glöð með hversu vel tókst til.“ Herbergið fyrir litla prinsinn, Bjart Elí, var tilbúið þegar hann kom í heiminn en hann er frumburður þeirra Gretu Salóme og Elvars. „Ég er svo fegin að við vorum búin með mest allt fyrir komu hans í heiminn og herbergið hans er einn af mínum uppáhalds stöðum á heimilinu, hingað kem ég til að komast í kyrrð og ró.“ Fallegt veggfóður prýðir einn vegginn í barnaherberginu með skýjamyndum sem skapa rómantík og hlýju.

Missið ekki af áhugaverðri og skemmtilegri heimsókn Sjafnar til Gretu Salóme og sonarins í kvöld í þættinum Matur og heimili á Hringbraut í kvöld, fyrst klukkan 19.00 og aftur klukkan 21.00.

Hægt er að sjá brot úr þætti kvöldsins hér:

Matur og heimili: Innlit til Gretu Salóme