Þann 1. desember síðastliðinn sá Matvælastofnun ástæðu til að setja færslu inn á heimasíðu sína sem var með eftirfarandi fyrirsögn:

„Matvælastofnun selur ekki miða á jólatónleika.“

Misskilning þeirra sem virðast hafa talið svo vera má líklega rekja til myndbands á Facebook síðu Rún viðburða, frá 27. nóvember, sem stóð fyrir jólatónleikunum Jólaljós og lopasokkar í Hofi á Akureyri 2. desember. Í myndbandinu má sjá mæðginin Eddu Björgvinsdóttir og Björgvin Franz Gíslason auglýsa tónleikana en Björgvin var einn þeirra sem kom þar fram. Í myndbandinu bregður Edda sér í hlutverk einnar af hennar ástsælustu persónum, Bibbu á Brávallagötunni. Bibba fer í myndbandinu með ítrekaðar rangfærslur um tónleikana og miðasölu á þá sem Björgvin leiðréttir jafn harðan.

Meðal annars segir Bibba um miðasöluna:

„Ég fór bara á netinu að panta á mast.is.“

Þetta leiðrétti Björgvin snarlega:

„Það er Matvælastofnun.“

Í færslu Matvælastofnunar segir meðal annars:

„Vegna fjölda fyrirspurna þá ítrekar Matvælastofnun að stofnunin hefur ekki til sölu miða á jólatónleikana Jólaljós og Lopasokka.“

Hvort hér var um grín að ræða af hálfu Matvælastofnunar eða það hafi verið virkilega verið þannig að fólk hafi í stríðum straumum snúið sér til stofnunarinnar til að kaupa miða skal ósagt látið.

Þótt tónleikarnir hafi þegar verið haldnir er þessi meinti misskilningur þó eitthvað sem lesendur hafa vonandi gaman af.

Færslu Rún viðburða með myndbandinu af Bibbu og Björgvini má sjá hér fyrir neðan.