Þegar söngkonan Stefanía Svavarsdóttir lýsir barneignaferli hennar og tvíburasystur hennar er eins og hún sé að lýsa söguþræði í bíómynd. Hún segir frá þessu í Fókus, spjallþætti DV.

Sjá einnig: Að deila forræði það erfiðasta við skilnað – „Af því að ég var ekki að eignast börn til þess að þurfa að deila þeim“

Árið 2020 var erfitt fyrir Stefaníu. Hún komst að því að hún væri óvænt ólétt en á þeim tíma voru erfiðleikar í sambandi hennar og barnsföður hennar og þau hættu saman þremur mánuðum seinna. Hún var þá einstæð með lítið barn en hún var ekki ein.

Hún rifjar upp daginn sem hún komst að því að hún væri ólétt og hringdi í tvíburasystur sína, Steinunni Svavarsdóttur.

„Ég hringdi í hana og sagði henni að ég væri ólétt og hún var jafn hissa og ég. Hún sagði: „Það er eitthvað skrýtið í gangi hjá mér, ég er ekki byrjuð á blæðingum. En það er örugglega ekki neitt.“ Síðan hringdi hún í mig daginn eftir og sagði mér að hún hafi pissað á próf og væri ólétt,“ segir Stefanía.

„Þetta er eins og ein stór lygasaga. Svo fórum við í mæðravernd og vorum settar 5. og 6. desember, og eignuðust börnin 10. og 11. desember. Systir mín hafði hætt með barnsföður sínum viku áður en hún komst að því að hún væri ólétt. Þannig við ákváðum að flytja inn saman, vorum saman óléttar og saman í fæðingarorlofi og það var stórkostlegt. Þetta var alveg eins og bíómynd,“ segir hún.

„Að öllum feðrum ólöstuðum, en að vera með annarri konu í fæðingarorlofi var alveg geggjað.“

Hún segir nánar frá þessu í spilaranum hér að ofan, brotið er hluti af síðasta þætti Fókuss sem má horfa á í heild sinni hér.

Fylgstu með Stefaníu á Instagram og smelltu hér til að hlusta á tónlistina hennar á Spotify.