Margrét Edda Gnarr var um árabil einn fremsti atvinnumaður okkar Íslendinga í bikinífitness og sankaði að sér titlum, bæði hérlendis og erlendis. Hún lagði skóna á hilluna árið 2018 til að sigrast á átröskun, sem hún hafði glímt við í einhvers konar formi frá fimmtán ára aldri. Á svipuðum tíma leitaði hún sér einnig aðstoðar vegna áfengisvanda og hefur nú verið edrú í fimm og hálft ár.
Sjá einnig: „Ég hugsaði: Hvað er ég að gera? Ég er að drepa mig fyrir plastbikar“
„Þetta var fyrst mjög erfitt og ég ákvað að þiggja alla hjálp sem var í boði. Ég fór líka að lesa mikið um átraskanir og horfa á mikið af YouTube-myndböndum um bataferli […] Það sem ég óttaðist mest, og það sem margir sem kljást við átraskanir óttast, var að þyngjast. Og þetta stjórnleysi,“ segir hún.
„Ég hef unnið sem einkaþjálfari í mörg ár og ég veit ekki hversu oft ég hef heyrt fólk segja að það hafi aðeins ætlað að fá sér eina kökusneið en hafi síðan borðað ógeðslega mikið. Það skilur ekki hvað kom yfir það, en ég trúi því að þetta sé líkaminn að reyna að halda manni á lífi því hann heldur að það sé eitthvað svelt í gangi og það sé ekki til matur. Þetta stjórnleysi er líkaminn að reyna að bæta á mann líkamsfitu þannig ef það skyldi aftur koma sveltástand þá er hann með birgðir fyrir það. Mér fannst fallegt að hugsa þetta þannig, því ég var alltaf að berjast á móti líkamanum mínum en hann var bara að reyna að halda mér á lífi.“
Hún segir nánar frá þessu í spilaranum hér að ofan. Brotið er hluti af nýjasta þætti af Fókus, þú getur horft á hann í heild sinni hér, eða hlustað á Spotify.
Fylgstu með Margréti á Instagram.
