Leikarinn og tónlistarmaðurinn Will Smith hefur brugðist við sprengjunni sem eiginkona hans, Jada Pinkett Smith, varpaði í síðustu viku en þá tilkynnti Jada að hún og Smith hefðu skilið að borði og sæng fyrir sjö árum.

Jada sagði jafnframt að hún og Smith væru ekki að íhuga lögskilnað en þó enn að finna út hver framtíð hjónabands þeirra væri.

Sjá einnig: Sprengju-opinberun hjá stjörnuhjónunum – Allt í steik á bak við tjöldin og 7 ára leyndarmál dregið fram í dagsljósið

Jada gaf út ævisögu sína á dögunum þar sem ýmislegt áhugavert kemur í ljós. Hún talar um erfiðleika sína á unglingsárunum í Baltomire, þunglyndi sem hún upplifði eftir að hún missti einn sinn besta vin, rapparann Tupac, og sjálfsvígshugsanir sem hún hefur upplifað í seinni tíð.

Smith skrifaði bréf til eiginkonunnar, eftir að hann las bókina, sem var lesið upp í hlaðvarpsþætti Jay Shetty um helgina.

„Ef ég hefði lesið þessa bók fyrir 30 árum hefði ég örugglega knúsað þig oftar. Ég skal byrja á því núna,“ sagði hann og bætti við að hann elskaði hana endalaust.

Smith tjáði sig einnig um ævisöguna við New York Times á dögunum og sagði að bókin hefði verið ákveðin vakning fyrir hann. Jada hefði „lifað meira á brúninni“ en hann taldi og hún hafi sýnt það og sannað með bókinni að hún sé sterkari og klárari en hann taldi.