Poppvélin sendir í dag frá sér lagið Bærinn minn sem er lag Hjarta Hafnarfjarðar í ár.

Sveitin fékk til liðs við sig Hafnfirðinginn Heiðar Örn Kristjánsson (oftast kendnan við Botnleðju) við flutning lagsins. Syngur hann því dúett á móti Sólveigu Ásgeirsdóttur, söngkonu hljómsveitarinnar. En aðrir meðlimir hljómsveitarinnar eru þeir Örlygur Smári og Valgeir Magnússon.

„Þegar þessi hugmynd kom upp að við yrðum með lag hátíðarinnar í ár, vissi ég strax að þetta lag væri lagið. Það grúvar flott við þá nostalgíuhugmynd sem þarf að vera í slíku lagi enda gekk það svo glimrandi upp þegar Vall bjó til þennan nostalgíutexta við lagið. Það er mjög gaman og mikill heiður að fólk vilji nota lagið okkar sem einkennislag hátíðarinnar í ár,“ segir Örlygur Smári um lagið og það að Hjarta Hafnarfjarðar skyldi hafa valið lagið sem lag hátíðarinnar.

„Ég reyndi að rifja upp hvernig manns næsta umhverfi tekur utan um mann þegar maður er að alast upp þegar ég var að semja þennan texta. Það sem helst er að gerast þegar maður er barn og unglingur og upplifir sitt nánasta umhverfi sem öryggi og vinasamfélag og svo kemur ástin að sjálfsögðu við sögu. Ég reyndi að gera það að verkum að textinn gæti átt við hvaða bæjarfélag sem er svo hver og einn getur tengt við það fyrir sjálfan sig, hvar sem viðkomandi ólst upp. Í mínu tilfelli fór ég í huganum í Fossvog í Reykjavík þar sem ég ólst upp. En svo sá ég að þetta virkaði þegar Heiðar gat tengt við sína æstku í Hafnarfirði. Hljómsveitin klráraði svo textann í sameiningu,” segir Valgeir um texta lagsins.

Lagið kemur út í dag, þriðjudaginn 5. júlí og má hlusta á það hér