Í þættinum Matur og heimili á Hringbraut í kvöld verður byrjað að telja niður í jólin. Innlit á falleg heimili í jólabúninginn verða í forgrunni þar sem töfrar jólanna gerast. Sjöfn heimsækir Þórunni Högnadóttur stílista og fagurkera með meiru. Þórunn elskar þennan árstíma og er búin að skreyta allt heimilið hátt og lágt, meira segja dekka jólahátíðarborðið.

„Ég elska jólin og þetta er uppáhalds árstíminn minn, ef einhver getur skreytt yfir sig þá er það örugglega ég,“ segir Þórunn og hlær. Þórunn byrjar ávallt snemma að skreyta og er helst búin að skreyta heimilið fyrir aðventuna. Þórunn býr yfir listrænum hæfileikum og svo er hún líka svo hugmyndarík. Hún segist aldrei vera með það sama þó hún nýti sama jólaskrautið aftur og aftur. „Eins og kransarnir mínir, ég skipti oft um litaþema og sama á við kertin,“ segir Þórunn og bætir við að sama eigi við jólatrésskrautið. Hún sé ávallt með eitthvað þema og í ár séu það glærir glersteinar sem hún sé búin að eiga lengi. „Ég er svo hrifin af svona glingri.“

Þemað í jólaskrautinu er breytilegt frá ári til árs og sviptir Þórunni hulunni af jólalitunum sínum í ár í þættinum.

Missið ekki af einstaklega fallegu jólainntili til Þórunnar.

Hér má sjá brot úr þætti kvöldsins:

Matur og heimili stikla 29. nóvember 2022