Fyrir nærri 13 árum síðan kom meistaraverk James Cameron og tekjuhæsta kvikmynd allra tíma, Avatar, í kvikmyndahús og nú loksins fer að líða að því að framhaldsmyndin, Avatar: The Way of Water, birtist á stóra tjaldinu.

Forsala miða á Avatar: The Way of Water hefst klukkan 17:00 í dag en myndin verður frumsýnd þann 16. desember næstkomandi.

Sambíóin í Kringlunni hafa verið lokuð að undanförnu vegna framkvæmda og endurbóta en nú fer að líða að því að bíóið opni á ný. „Nú í lok nóvember er fyrirhuguð opnun á fyrsta áfanga eftir breytingar,“ segir í tilkynningu frá Sambíóunum.

„Fljótlega í kjölfarið verður svo opnaður stærsti og glæsilegasti VIP LÚXUS bíósalur landsins og þótt víðar væri leitað.“

Í tilefni þess að Sambíóin Kringlunni eru að vakna aftur til lífsins eftir fegurðarblund sinn verður Avatar: The Way of Water sýnd í 2D og 3D í heilan sólarhring og verða fyrstu sýningar klukkan 10:40 að morgni 16. desember.

Forsala á myndina hefst klukkan 17:00 í dag en hægt er að kaupa miða á sýningarnar á sambio.is og í miðasölum Sambíóanna.