Meiriháttar breytingar hafa verið gerðar á stigagjöfinni í Eurovision-söngvakeppninni fyrir næsta ár, en Samtök evrópska sjónvarpsstöðva (EBU) hafa tilkynnt að á næsta ári muni stig frá dómnefnd ekki hafa nein áhrif í undanriðlinum heldur aðeins á lokakvöldi keppninnar.
Þessar breytingar koma í kjölfar meints svindls sem átti sér stað í ár þar sem meðlimir sex dómnefnda eru sagðir hafa svindlað og haft samráð sín á milli um hvernig stigunum yrði skipt.
EBU segja að breytingarnar séu líka liður í því að halda keppninni spennandi.
Eins verða þær breytingar gerðar að öll heimsbyggðin fær að velja sitt uppáhalds lag. Það þýðir að áhorfendur ríkja sem ekki taka þátt í keppninni geta kosið sitt uppáhald á netinu. Þessi atkvæði verða talin saman og gefið sama vægi og atkvæðum hvers þátttökuríkis eða með öðrum orðum, heimsbyggðin mætir í atkvæðagreiðsluna sem eitt „auka“ aðildarríki.
Þessi kosning mun eiga sér stað í gengum öruggt svæði á netinu þar sem fólk þarf að nota kreditkort til að mega kjósa.
Í undanriðlinum mun, líkt og áður segir, engin dómnefnd hafa áhrif heldur verða bara atkvæði í gegnum síma, appið eða á netinu sem velja hvaða atriði komast áfram. Dómnefndir munu þó fylgjast með og gefa upp sitt álit sem verður aðeins nýtt til vara ef svo færi að kosning almennings í einhverju þátttökuríki komist ekki til skila.
Dómnefnd mun þó hafa áhrif sem áður á lokakvöldinu. Eina breytingin á lokakvöldinu verður sú að atkvæði heimsbyggðarinnar fá nú að vera með.
Tilkynning EBU um breytingarnar