Robert Downey Jr. hefur vakið gífurlega athygli fyrir nýtt útlit sitt sem hann frumsýndi á rauða dreglinum um helgina. Leikarinn, sem er hvað þekktastur fyrir hlutverk sitt sem Járnmaðurinn í Marvel söguheiminum, er búinn að skafa af sér hárið. Fjölmargir netverjar voru furðu lostnir þegar þeir sáu myndir af leikaranum með ekkert hár á höfðinu.
„Ég þekkti hann ekki í heila mínútu,“ segir til dæmis einn netverji. Þá furða mörg sig á því hvers vegna leikarinn skafaði hárið af. Var því til dæmis velt upp að hann gæti verið að missa hárið og að hann hafi ákveðið að láta það fjúka þess vegna.
Það er þó afskaplega einföld ástæða fyrir þessu, Robert losaði sig við hárið fyrir hlutverk sitt í sjónvarpsþáttunum The Sympathizer sem verða frumsýndir á HBO á næsta ári. Skömmu fyrir síðustu hrekkjavöku leyfði hann krökkunum sínum að raka af sér hárið og birti myndband af því á Instagram-síðu sína. „Ég vil ekki vera með skallakollu, viljiði raka á mér hausinn?“ spyr hann krakkana í myndbandinu sem sjá má hér fyrir neðan.
View this post on Instagram
