Fyrrum klámstjarnan Jenna Jameson hefur verið greind með Guillain-Barré heilkennið, sem er sjaldgæfur taugasjúkdómur þar sem ónæmiskerfi líkamans veldur skaða á taugafrumum.
Jenna greindist með heilkennið í kjölfar þess að hún hætti skyndilega að geta gengið. Kærasti hennar, Lior Bitton, greindi aðdáendum Jennu frá þessu á dögunum.
Lior sagði að Jenna hafi verið slöpp undanfarnar vikur og ítrekað kastað upp. Hún hafi farið á sjúkrahús í síðustu viku þar sem hún hafi undirgengist rannsóknir en ekkert komið úr þeim svo hún var send aftur heim.
„Svo þegar hún kom heim gat hún ekki haldið sér á fótum. Vöðvarnir í fótum hennar voru afar veikburða. Hún gat ekki staðið upp og gengið inn á baðherbergi. Hún bara féll á leiðinni á eða frá baðherberginu og ég þurfti að taka hana upp og bera hana aftur upp í rúm. Svo á aðeins tveimur dögum varð þetta enn verra. Hún gat með engu móti staðið og ekki gengið.“
Guillain-Barré heilkennið getur valdið verkjum, dofa, slappleika í vöðvum og getur í alvarlegustu tilfellum leitt til lömunar. Hins vegar ná flestir að jafna sig á þessum sjúkdómi.
Jenna er nú á sjúkrahúsi þar sem hún undirgengst meðferð við sjúkdóminum og endurhæfingu.
Lior segir að það gangi vel. „Hún getur sem stendur ekki staðið í lappirnar. Þeir eru að hefja meðferðina og svo sjá þeir til með framhaldið.“
Guillain-Barré heilkennið hefur greinst sem sjaldgæf aukaverkun af bóluefninu Janssen. Jenna hefur þó skýrt tekið fram að bóluefni hafi ekkert með hennar greiningu að gera. „Þetta er ekki aukaverkun af bólusetningu.“
Jenna Jameson hefur oft verið kölluð heimsins frægasta klámleikkona eða Klámdrottningin. Hún byrjaði að leika í erótískum myndböndum árið 1993 eftir að hafa unnið sem fatafella og fyrirsæta. Hún hætti að leika í klámi árið 2008.