Eurovisionkeppnin er í næstu viku og þar mun Daði ásamt Gagnamagninu stíga á svið í síðari undankeppninni í Rotterdam Hollandi.
Æfingar eru nú hafnar og rétt í þessu steig Daði á svið í fyrsta sinn. Að vanda birta aðstandendur keppninnar brot úr æfingunni svo hægt er að fá smjörþefinn af því hvernig þetta mun líta út á sjálfan keppnisdaginn.
Æfingin hjá Daða átti að hefjast klukkan 14:00 en seinkaði um tuttugu mínútur. Blaðamenn félags áhugafólks um Söngvakeppni evrópskra sjónvarpsstöðva, FÁSES, lýstu fyrstu æfingunni í beinni útsendingu á Facebook síðu sinni og gátu varla hamið sig af gleði.
Hér má sjá brot af upphrópunum þeirra á meðan á æfingunni stóð:
„Gæsahúð, ó Jesús“
„Það eru ný múv, það eru pósur“
„Glæný hljóðfæri“
„Sérðu vísunina í Pollapönk?“
„Regnbogi og einhyrningur!“
„Það er búið að búa til áhorfendur í bíósal og þau eru öll með gagnamagnsandlitin“
„Nei þetta er gagna-magnað, eins og einhver sagði“
Þau sögðu líka að á blaðamannaspjallinu, þar sem blaðamenn sem eru að fylgjast með æfingunum tala saman hafi viðbrögðin verið frábær. Meðal annars sagði einn „Winner-alert“ eða varúð hér er sigurvegarinn.
Sem stendur er Íslandi spáð sjötta sæti í keppninni í veðbönkum sem verður að teljast ágætis staða. Allt getur breyst mjög hratt í Eurovision-heiminum og hefur sviðsetning og frammistaða á æfingum mikið að segja. Því verður áhugavert að kíkja í veðbankana síðar í kvöld eða í fyrramálið og sjá hvaða áhrif æfingin hefur haft. Strax þegar þessi frétt er rituð er Ísland komið með grænan stuðul inn á Eurovision Odds sem þýðir að við séum að hækka frekar en lækka.
„Við getum svo sannarlega verið stolt af þeim,“ sögðu Fáses liðar og gáfu æfingunni 12 stig.