Mick Jagger, söngvari Rolling Stones, og Dave Grohl, fyrrum meðlimur Nirvana og stofnandi Foo Fighters, gáfu út nýtt lag í gærkvöldi með því markmiði að kveðja kórónuveiruna en Bandaríkjamenn eru komnir á gott flug með bólusetningar í landinu.
Lagið ber nafnið Easy Sleazy og fer Jagger yfir síðastliðið ár á tímum Covid-19 í texta sínum. Jagger syngur línur á borð við: „Horfandi á línuritin með stækkunargleri, hætt við allar ferðir, falskt lófatak fótboltans“
Í texta lagsins skýtur Jagger á samsæriskenningasmiði og má heyra hann syngja um að Bill Gates sé í blóði sínu eftir bólusetningu, jörðin sé flöt og að hlýnun jarðar sé ekki til.
Jagger segir þó að allt verði einfalt og æðislegt bráðum. „Við erum öll á leiðinni aftur til paradísar,“ segir hann.
