Konudagurinn er í dag. Tilvalinn tími til að sýna konunum í þínu lífi hvað þær skipta þig miklu máli. Við heyrðum í nokkrum ofurkonum og báðum þær um að lýsa draumakonudeginum sínum.
„Stútfullur af konum! Ég er gift konu og umkringd alveg ótrúlega mörgum mögnuðum konum, svo ég fagna því sannarlega á konudaginn. Ætli draumakonudagurinn myndi ekki hefjast á kaffibolla í rúmið frá minni konu. Svo tæki við góður konudags-brunch með fjölskyldunni, með tilheyrandi gúmmelaði og næsheitum. Eftir það tækjum við hjónin bíltúr út fyrir bæjarmörkin, fengjum okkur kvöldverð á notalegum stað og enduðum svo í bústað með heitum potti. Það væri algjör draumur!“
„Dagurinn mundi byrja á því að Siggi minn vekur mig með kossi, lyftir mér upp og heldur á mér úr rúminu inn í eldhús, þar sem dýrindis morgunmatur bíður mín. Gæti verið vesen samt fyrir hann að halda á mér, en það væri fallegt.
Eftir morgunmatinn heldur hann á mér inn í herbergi þar sem bíða mín ný föt fyrir daginn. Leið okkur liggur svo niður á Reykjavíkurflugvöll þar sem þyrla bíður okkar. Þyrlan fer með okkur í klukkutíma ferð þar sem við stoppum á toppi Esjunnar og fáum okkur jarðarber.
Eftir þyrluna heldur Siggi á mér inní bíl og fer með mig í eins og hálfs tíma dekur. Nudd og svo notalegur kaffibolli og „meððí“ í heita pottinum.
Eftir dekrið færum við á hótel „down town“ Reykjavík, gott að borða og barnlaus nótt. Kannski væri Siggi reyndar kominn með í bakið eftir daginn eftir að hafa haldið á mér út um allt, enda er ég 180 cm.
Þetta væri svona draumadagur – því ég fæ aldrei að halda upp á Konudaginn þar sem ég hjálpa öðrum að gleðja. Ég starfa í blómabúðinni Ísblóm og er í hlaupaskónum frá morgni til kvölds að afgreiða blóm.“
„Já, draumakonudagurinn minn er einmitt að fara að rætast um helgina. Nú er búið að opna Þjóðleikhúsið á ný og ég er að fara með barnabörnin mín þrjú; Margréti Stefaníu 10 ára, Friðrik Ólaf 8 ára og Hólmfríði Elínu 5 ára, á Kardimommubæinn. Það er alltaf svo hátíðlegt að fara í Þjóðleikhúsið. Við hlökkum öll mikið til, enda eru þetta miðar frá því haust sem loksins er hægt að nýta núna vegna Covid-19 ástandsins.“
„Þessi dagur er nú ekki háheilagur fyrir mér en ég yrði mjög glöð ef ég fengi að sofa út – sem er til sirka níu af því ég hef aldrei á ævinni kunnað að sofa út. Svo á fullkomnum degi myndi líka góður bröns á góðum stað gleðja eða að maðurinn minn myndi baka pönnukökur. Svo væri ég til í gott kaffi, BLÓM af því ég elska blóm og súkkulaði. Þá væri ég nú heldur betur glöð með daginn.“
„Það hentar mér einstaklega vel að konudagurinn sé á sunnudegi, því það er líklega uppáhalds dagur vikunnar hjá mér. Það fyrsta sem kemur uppí hugann eru – margir kaffibollar og margir kossar.
Draumadagur hjá mér væri í þessa áttina: Rjúkandi góður morgunbolli drukkinn uppi í rúmi, hlaupadeit með eiginmanninum þar sem við förum á hægu tempói og náum að spjalla um daginn og veginn, ekki væri verra ef það væri sól úti og að geislanir gæfu D vítamín inn í daginn. Í framhaldinu væri kjörið að gera sunnudagslummurnar. Plan dagsins er síðan ekkert aðal atriði svo lengi sem það er með fólkinu sem ég elska. Konudagurinn mætti síðan gjarnan enda á góðum kvöldverði og rauðvínsglasi með mínum manni, hvort sem það væri út að borða (sem er ekki í boði í Danmörku útaf svolitlu) eða late kvöldverður þegar börnin eru komin í háttinn. Hvort sem það sé á konudaginn eða bara einhvern allt annan sunnudag, þá er þetta dagur að mínu skapi.“
