Leikkonan Caitlin Stasey sem margir kannast við úr þáttunum Neighbours hefur fært sig úr sápuóperubransanum og er byrjuð að leikstýra klámmyndum. Þetta kemur fram hjá news.com.au.
Leikkonan, sem einnig er þekkt fyrir að vera gallharður femínisti, hefur gert samning við klámfyrirtækið Afterglow um að leikstýra nokkrum myndum en Afterglow einblínir á klám handa konum. Fyrirtækið er rekið af konum úr hinsegin-samfélaginu og segir Stasey að þetta séu „mjög svalar konur að gera mjög góða hluti,“ en fyrstu myndirnar frá Stasey áttu að byrja í framleiðslu í febrúar en Covid hefur sett strik í reikninginn.
Stasey hefur talað mikið fyrir normalíseringu á kynhvöt kvenna og líkamsvirðingu. Hún tók þátt í #freethenipple og fór á sínum tíma í stríð við Instagram fyrir að eyða myndum hennar þar sem hún var nakin.
Hún hefur þó ekki sagt sig alveg skilið við leiklistina en hún er að vinna í sjónvarpsseríu sem ber nafnið Bridge and Tunnel sem eru dramatískir grínþættir sem gerast í New York á níunda áratugnum.
Fleiri leikkonur hafa snúið sér frá leiklistinni og að klámi eins og Disney Channel-stjarnan Bella Thorne sem er með vinsælan OnlyFans aðgang. Á OnlyFans getur fólk búið til aðgang þar sem það selur nektarmyndir, myndbönd eða bara hvað sem er. Aðdáendur geta gerst fylgjendur gegn mánaðargjaldi eða keypt stakar myndir/myndbönd.