Söngkonan Margrét Eir Hönnudóttir þekkti föður sinn lítið sem ekkert á uppvaxtarárum. Þegar föðurafi hennar lést segir hún föður hennar hafa komið illa fram við hana og hafi hún þá ákveðið að loka á hann.
Hún segir frá þessu ásamt erfiðum móðurmissi, skemmtilegu brúðkaupi og öðru í forsíðuviðtali Vikunnar,
Margrét Eir var áður Hjartardóttir en er í dag Hönnudóttir. Hún breytti nafninu sínu eftir að föðuramma hennar dó árið 2005.
Margrét segir að hún var aldrei í miklu sambandi við föður sinn en hún var alltaf í sambandi við föðurömmu sína og -afa.
„Þegar afi dó kom pabbi ekki nógu vel fram við mig. Bara alls ekki. Og ég gerði ekkert til að verðskulda þessa framkomu. Ég gerði honum alveg grein fyrir því en hann var ekki tilbúinn að breyta rétt eða biðjast afsökunar. Þannig að ég tók ákvörðun um að loka þessum kafla um föður minn en vildi ekki breyta nafninu mínu á meðan föðuramma mín var á lífi. Þegar hún lést ákvað ég að láta verða af því að breyta eftirnafninu, ég vildi bara ekki særa hana því þetta var ekki svo mikilvægt,“ segir hún.
Móðir Margrétar lést í júlí 2019 eftir tveggja ára baráttu við krabbamein. Missirinn var mikill en þær mæðgur voru góðar vinkonur. Faðir Margrétar lést nokkrum mánuðum seinna, einnig úr krabbameini.
Hún viðurkennir að það hefði verið svolítið sérstakt að missa þau bæði með stuttu millibili. „Og skrýtið að missa föður minn sem ég þekkti þó ekki neitt. En ég var einhvern veginn búin að vinna mig út úr því að eiga aldrei eðlilegt feðginasamband við hann. Hann vildi ekki leysa málin fyrir dauða sinn og maður verður dálítið að velja sér bardagana sína; stundum er bara ekki hægt að fá fólk til að breyta rétt.“
Margrét var ekki viðstödd útför hans. „COVID var líka í mikilli uppsveiflu á þessum tíma og það voru strangar fjöldatakmarkanir í gangi.“
