Það sætir tíðindum að vinsælasti glæpasagnahöfundur landsins undanfarna áratugi, Arnaldur Indriðason, skuli ekki senda frá sér glæpasögu fyrir þessi jól heldur sögulega skáldsögu. Sigurverkið heitir bókin, en Morgunblaðið greindi frá þessu í morgun.
Um er að ræða 25. skáldsögu Arnaldar en hann á að baki 24 spennusögur. Arnaldur segir að hugmyndin að sögunni hafi komið til sín mjög skyndilega í fyrrasumar og skrifaði hann bókina á um sex mánuðum. Sagan gerist á Vestfjörðum og í Kaupmannahöfn á 18. öld. Fjallar hún um kynni íslensks úrsmiðs og Kristjáns sjöunda Danakonungs.
Tíðindin koma aðdáendum Arnaldar, sem og öðru bókaáhugafólki á óvart, og eru fjörlegar umræður um þetta í hinum vinsæla FB-hópi, Bókagull – Umræða um góðar bækur. Ónefndur málshefjandi segir: „Hvernig heldur fólk að þetta muni ganga hjá Arnaldi? Ég verð að viðurkenna að ég er efins.“
Annað áhugafólk í hópnum bendir á að Arnaldur sé sagnfræðimenntaður og þess sjái stað í bókum hans. Raunar eru flestir fyrir utan málshefjanda mjög spenntir fyrir þessum tíðindum. Einn segir:
Silja Aðalsteinsdóttir, þýðandi og bókmenntaritstjóri um áratuga skeið, segir: „Arnaldur er prýðilegur sagnfræðingur eins og hann hefur sýnt í fjölmörgum bóka sinna. Raunar er mis-fjarlæg fortíð nærri í flestum bókum hans.“