Það vita líklega ekki margir að Guðmundur Ingi Þóroddsson, formaður Afstöðu, var einu sinni fréttarritari hjá Íslenska útvarpsfélaginu. Guðmundur deildi í dag á Facebook þessari ljómandi skemmtilegu mynd sem fylgir fréttinni, en hann birtir hana í tilefni 35 ára afmælis Stöðvar 2:
„Í tilefni 35 ára afmæli Stöðvar 2 þá eru sennilega ekki margir sem vita að fyrir meira en 25 árum þá var ég í fréttabransanum einmitt hjá Stöð 2. Talandi um að hafa komið víða við. Þessa mynd fékk ég senda í dag frá góðum vini sem fann þetta í kassa eftir allan þennan tíma — er með fortíðarþrá.“
Í samtali við DV segir Guðmundur Ingi að þetta hafi verið skemmtilegur tími en stressandi: „Ég var með einhverja lögregluskannera og píptæki frá slökkviliðinu. Ég þurfti að hafa kveikt á þessu allan sólarhringinn og maður vaknaði ef eitthvað var um að vera og rauk út. Þá fór tæki slökkviliðisins oft í gang á nóttunni vegna smá atvika og oft dregið til baka en ég þurfti alltaf að rjúka út. Það má segja að maður hafi lítið sofið á þeim tíma.“
Aðspurður segir Guðmundur Ingi að hans hlutverk hafi ekki verið að skrifa eða flytja fréttir heldur afla upplýsinga. „Nei, ég var ekkert í því. Ég vann bara náið með útsendingarstjóra sem kallaði svo til fréttamenn eftir þörfum. Ef ég man rétt var Elín Hirst fréttastjóri og Hermann Hermannsson sjónvarpsstjóri.“
Þannig að þitt hlutverk var að afla upplýsinga? „Upplýsingar og taka myndir einnig fyrir fréttirnar. Vera á staðnum ef fréttamenn þurftu upplýsingar. Þannig að ég var með upptökugræjur alltaf með mér.“
Guðmundur Ingi segir ennfremur: „Þetta var ekki starf sem venjulegur maður getur unnið við lengi. Þó veit ég um nokkra sem voru mjög lengi í þessu á öðrum miðlum.“