Jamie Lynn Spears kallar Teslu rafbílinn „leynikattamorðingja“ og segir að forstjóri Teslu, Elon Musk, skuldi henni „nokkra ketti.“
Jamie Lynn er leikkona og söngkona, en flestir þekkja hana sem litlu systir Britney Spears. Í myndbandi á Instagram, sem hún hefur síðan þá eytt, segir hún Teslu bifreið sína hafa orðið nokkrum köttum hennar að bana, því kettirnir heyra ekki í bílnum þar sem hann er svo hljóðlátur.
„Við höfum nú misst – ég vil ekki segja ykkur hversu marga ketti – því þeir heyra ekki í Teslunni og hræðilegir hlutir gerast, og það er mjög hrikalegt og sorglegt fyrir alla sem koma að þessu,“ sagði hún í myndbandinu samkvæmt CNN og öðrum fjölmiðlum sem hafa fjallað um málið.
„Elon Musk, við skulum finna út úr þessu. Þú skuldar mér nokkra ketti.“
Jamie Lynn stakk upp á því að Tesla og aðrir rafbílar myndu gefa frá sér eitthvert hljóð sem truflar dýr og myndi leiða til þess að dýrin yrðu vör við bílana. Segir hún að þessi breyting myndi forða þeim frá illum örlögum.
CNN greinir frá því að samkvæmt bandarískum lögum eigi rafbílar að gefa frá sér hljóð upp á a.m.k. 43 desíbel, þegar þeir fara hægar en 30 kílómetra á klukkustund. Það er svipaður hávaði og heyrist í uppþvottavél.
Jamie Lynn endaði með að taka þetta allt til baka í nýrri færslu, sem hún hefur einnig eytt.
Hún sagðist ekki hafa keyrt yfir neina ketti og að Tesla „væri ekki sökudólgurinn.“ Hún tók það einnig fram að í svona málum eiga mannleg mistök sér einnig stað.