Leidy Ardila er frá Kólumbíu og þjáist af fibrous dysplasia, sem er mjög sjaldgæfur en góðkynja æxlisvöxtur í beini sem einkennist af útvíkkun beinsins vegna bandavefsvaxtar í merghol þess.
Leidy kemur fram í nýjum þætti frá Truly, sem hefur fengið um 800 þúsund áhorf þegar greinin er skrifuð.
Leidy fæddist ekki með sjúkdóminn, heldur þróaðist hann eftir hjartaaðgerð sem hún gekkst undir sem barn. Henni var gefið of mikið af sterum sem hún segir hafa orsakað sjúkdóminn. Læknar vöruðu móður hennar við að Leidy myndi ekki geta gengið og það væri ólíklegt að hún myndi lifa lengur en til tólf ára aldurs.
En Leidy hefur svo sannarlega sýnt að læknarnir höfðu rangt fyrir sér. Í dag er hún 29 ára og vinnur sem grafískur hönnuður. Hún notar samfélagsmiðla til að breiða út boðskap jákvæðrar líkamsímyndar og neitar að fela andlit sitt.
Hún segir það þó hafa verið erfitt að sætta sig við útlit sitt, sérstaklega þar sem fólk starir á hana á götu úti og stundum svo mikið að henni líður óþægilega. „Það tók mig langan tíma að læra að elska mig sjálfa, en ég geri það í dag,“ segir hún.
