Fjölmiðlakonan og pistlahöfundurinn Jana Hocking afhjúpar auðvelda leið til að vita hvort þú eigir að hætta með einhverjum eða ekki í pistli á News.au.
Jana viðurkennir að henni þykir tilhugsunin um hjónaband yfirþyrmandi. „Ég er á fertugsaldri og hef orðið vitni að þó nokkrum skilnuðum vinkvenna minna, þar að auki skilnaði foreldra minna og ég vil bara ekki taka ákvörðun í fljótfærni um svona lagað,“ segir hún.
Jana segir að í hvert skipti sem hún er að hitta karlmann þá framkvæmir hún „hjónabands-prófið.“
„Þetta próf leyfir mér að ákveða hvort ég eigi að halda áfram að hitta einhvern,“ segir hún.
„Ég geri þetta eftir þó nokkur stefnumót, kannski eftir svona þrjá mánuði. Ég horfi á manninn og ímynda mér að ég sé að fara að ganga upp að brúðkaupsaltarinu. Ég hugsa: „Ef ég kem að altarinu og horfi á hann, mun ég brosa og vera virkilega spennt að sjá hann? Mun ég hugsa: „Hvernig varð ég svona heppin?“ Eða… mun ég bara hugsa: „Ókei frábært, hann virkar eins og góð manneskja og ég reikna með að eiga frekar fínt líf með honum þannig bara gerum þetta.““
Jana segir að ef hún velur fyrri valmöguleikann þá heldur hún áfram að hitta manninn, en ef hún velur þann seinni þá slítur hún sambandinu.
„Við þekkjum öll þessi hjón sem hafa verið gift í 20 ár og virðast vera enn jafn ástfangin, ég vil það […] Minn stærsti ótti er að fríka út því ég er 36 ára og sætta mig við einhvern gæja sem lætur hjarta mitt ekki taka kipp. En ég virkilega trúi því að það sé betra að bíða eftir ástinni.“