Í gær var tilkynnt um hertari aðgerðir vegna kórónuveirufaraldursins hér á landi. Íslendingar voru fljótir að tjá sig um stöðu mála og var ljóst að ekki allir voru á sama máli um ágæti aðgerðanna. Sumum finnst til dæmis að það hefði átt að loka landamærunum fyrir ferðamenn og einhverjum líður eins og það sér verið að taka hag þeirra fram yfir hag Íslendinga.

Tónlistarmaðurinn vinsæli Herra Hnetusmjör, eða Árni Páll Árnason eins og hann heitir réttu nafni, virðist vera í hópi þeirra sem er á því máli. „Hvað á maður samt að láta bjóða sér þetta kjaftæði mikið lengur?“ spyr Herra Hnetusmjör í færslu sem hann birti á Facebook-síðu sinni í gær. Færslan hefur vakið afar mikla athygli en mikill fjöldi fólks hefur líkað við hana og deilt henni.

„Hversu oft þurfa íslenskir ríkisborgarar að loka sig af á meðan túristar þykjast fara í sóttkví? Hversu mörg afbrigði inn um landamærin til að við gefum skít í ríkisstjórnina? Við erum greinilega ekki í þessu saman.“