Það getur verið spennandi að breyta til í svefnherberginu og prófa nýjar stellingar. En það borgar sig að fara varlega því kynlífstengd slys eru algengari en þig grunar.
Samkvæmt könnun, sem brasilískir læknar gerðu meðal karlmanna sem leitað höfðu á slysadeild eftir að hafa meitt sitt allra heilagasta meðan á kynlífi stóð, var algengasta ástæða meiðslanna ein ákveðin stelling sem nýtur nokkurra vinsælda. Hún gengur jafnan undir nafninu kúrekastelpan (e. cowgirl), en þá situr konan klofvega ofan á karlinum sem liggur á bakinu. Hundastellingin (e. doggy style) getur einnig verið hættuleg.
Könnunin var gerð meðal gagnkynhneigðra karlmanna sem brákað höfðu á sér liminn meðan á kynlífi stóð. Það gerist þegar stífur limurinn er beygður of harkalega. Þá getur innra hólf limsins rofnað með tilheyrandi bólgum og sársauka.
Samkvæmt sömu könnun, sem Mail Online vitnar til, er öruggasta stellingin hin svokallaða trúboðastelling, þegar karlinn liggur ofan á konunni, andlit í andlit. Könnunin náði til 44 karlmanna sem leitað höfðu á þrjú sjúkrahús í Brasilíu. Niðurstöðurnar voru birtar í tímaritinu Advances in Urology.
