Tónleikum rokksveitarinnar Skunk Anansie, sem halda átti í Laugardalshöll í október hefur verið frestað fram í júní vegna kórónuveirufaraldurs. Þetta kemur fram í fréttatilkynningu.
Ný dagsetning er 5. júní og munu þeir miðar sem seldir hafa verið gilda sjálfkrafa fram að nýrri dagsetningu, en vilji einhverjir frekar fá endurgreitt þá stendur það til boða. Í tilkynningu Twe Live segir:
„Til miðaeigenda:
Miðarnir þínir gilda sjálfkrafa áfram á nýrri dagsetningu og þú þarft ekkert að aðhafast frekar.
Við hjá Twe Live værum ótrúlega þakklát ef miðaeigendur væru til í að halda í miða sína og styðja þar með við viðburðahald á Íslandi sem á undir högg að sækja þessa dagana. Ef ný dagsetning hentar alls ekki geta miðaeigendur óskað eftir endurgreiðslu með því að senda tölvupóst á info@tix.is innan 14 daga frá og með deginum í dag, það er í síðasta lagi mánudaginn 12. október. Athugið að ef greitt var með greiðsluappi (Aur, Kass eða Síminn Pay) eða með ferðagjöf stjórnvalda þarf að senda reikningsupplýsingar með.“
