Sara og Ósk grilluðu sykurpúða með foreldrum sínum. Myndir/aðsendar
Bergrún Íris Sævarsdóttir, bæjarlistamaður Hafnarfjarðar, bauð í svalasta sumarpartýið í garðinum heima hjá sér í dag þann 17. júní. Tilefnið var útgáfa bókar Bergrúnar, Kennarinn sem hvarf sporlaust, og var útgáfu bókarinnar fagnað með nýstárlegum hætti.
Bókin fjallar um krakka í skíðaferðalagi og voru gestir hvattir til að mæta með skíðagleraugu eða annan skíðabúnað samkvæmt þema bókarinnar. Margir skelltu sér því í snjógalla jafnvel þó veðrið gæfi ekki endilega tilefni til þess.
Flottasti skíðamaðurinn var valinn og fékk veglega bókagjöf frá Bókabeitunni og gjafabréf á námskeið í myndlýsingum hjá Bergrúnu.
Gestir og gangandi gátu spreytt sig á gátum mannræningjans, leikið í garðinum og hoppað á trampólíni auk þess að næla sér í áritað eintak af Kennaranum sem hvarf sporlaust. Grillaðir sykurpúðar og heitt kakó var í boði eins og í öllum góðum skíðaferðalögum.
Sumarpartýið var haldið samkvæmt þema þjóðhátíðardagsins í Hafnarfirði um að halda sína eigin heimahátíð vegna samkomutakmarkana í skugga kórónuverufaraldursins.