Miklar sviptingar hafa verið í veðbönkum í dag í tengslum við Eurovision-keppnina sem fer fram í Rotterdam í Hollandi í maí næstkomandi.

Daði Freyr og Gagnamagnið hafa verið að rokka á milli fyrsta og annars sætis í veðbönkum og hingað til hefur litháenska sveitin The Roop með lagið On Fire veitt þeim hörðustu samkeppnina. Nú hefur búlgaríska söngkonan Victoria hins vegar skotist í toppsætið með lagið Tears Getting Sober og skotið Daða Frey í annað sæti.

Það er vægt til orða tekið að segja að íslenska framlagið, Think About Things, og Tears Getting Sober séu ólík lög. Victoria sjálf er ein af lagahöfundum búlgarska framlagsins en það fjallar um mikilvægi geðheilsu. Jafnframt er það hvatning til fólks til að vinna í sínu eigin geðheilbrigði.

Skilafrestur á lögum í Eurovision-keppnina rennur út í dag. Enn eiga Rússar eftir að opinbera sitt lag. Sem stendur er þeim spáð fimmta sæti og því ljóst að ýmislegt getur gerst í dagslok.