„Til okkar sem eldri erum og vitrari, engin mengun og engin kolefnisspor,“ skrifar Geir Birgir Guðmundsson þar sem hann birtir myndina hér að neðan á Facebook-síðu sinni. Eins og sést gefur þarna að líta auk hefðbundinna líkkistna, myndir af pappalíkkistum sem kosta 12.000 krónur.

Í stuttu samtali DV við Geir segir hann þetta vera grín hjá sér. En aðspurður hvort ádeilubroddur sé í gríninu, segir hann: „Já, miðað við verðið á kistum hér heima.“ Er Geir ekki einn um að þykja líkkistur á Íslandi vera mjög dýrar og útfararkostnaður er mörgum þungur baggi.

Fjölmargir hafa deilt færslu Geirs og mælist hún vel fyrir. Berghildur ein skrifar til dæmis: „Þetta er alveg bráðsniðugt þá grotnar hylkið af okkur fyrr og verður að frjórri mold. Af jörðu ertu komin, að jörðu skaltu aftur verða.“

Valgerður skrifar:

„Ég persónulega myndi vilja vera sett í pappakassann. Fáránlegt að krakkarnir séu að eyða aurunum í þessa vitleysu.“

En Kristjana er ekki sannfærð og segir: „Flýtir það nú bara ekki förinni niður til helvítis?“

Helga nokkur skrifar hins vegar: „Þetta er gráupplagt. Barna- og barnabörn geta skreytt boxið, litað og málað og skreytt með glansmyndun. – Hvaða stærðir eru í boði ?“